OS CERTAMES LITERARIOS ATACAN DE NOVO

Para os que teñen algo que contar, para os que senten intensamente, para os que cren que teñen talento, para os que non... Para os que queiran, aquí está de novo a oportunidade de expresar o que levan dentro. Ánimo!, o prazo remata o 4 de maio.
Os carteis, deseñados por Berto, son realmente impactantes, ou non? Clicade nas imaxes para agrandalas e ver as bases.

Exposición VEXETAIS DE GALICIA

Este venres, día 16, remata a exposición sobre as especies vexetais galegas, ubicada no corredor da biblioteca. Trátase dunha mostra itinerante, elaborada polo EDL do IES Ribeira do Louro (O Porriño) e, por mor da súa demanda, temos que desmontala o venres. A exposición recolle un amplo repertorio de árbores, arbustos, plantas, herbas e flores con fotografías a tamaño real, clasificadas e nomeadas. Non a perdades, paga a pena.

CANLETV. A web do audiovisual galego

Logo de que desaparecese "FlocosTV", por fin volvemos ter unha páxina na que está reunida unha parte da produción audiovisual en Galiza. Trátase dun portal que depende da AGADIC (Axencia Galega de Industrias Culturais) e que se configura como mostra ou escaparate dos nosos artistas.
A web chámase canletv e, a partir de agora mesmo, estará na nosa lista de ligazóns. Como aperitivo colgamos esta curta de animación: A espía que xurdiu do fillo (2006), obra de Fran Pedreira.

Ás voltas co entroido e as súas coplas

Estreamos vídeo coas fotos do entroido deste ano (moi profesionais, grazas a Bea Tapia) e a letra gañadora no concurso de coplas. Fixádevos ben nos disfraces e na letra, non ten desperdicio. Ah, e expoñede a vosa opinión na enquisa da marxe.

O ENTROIDO XA ESTÁ AQUÍ

Un ano máis chega a festa dos disfraces ao instituto. Este ano imos contar, entre outras, coas seguintes actividades:

• Torneo de xadrez
• Partido de fútbol sala entre profesores e alumnos
• Concurso de disfraces
• Concurso de coplas de entroido

Para ambientarnos, confeccionamos (un pouco ás carreiras) un mural gráfico sobre esta celebración en Galiza.
A gozar!

Un novo xornal dixital en galego: PRAZA PÚBLICA

Dende hai máis dunha semana xa funciona, e ben, Praza Pública, un novo xornal que emprega o galego como lingua exclusiva. Canta falta facía!

"OS RESENTIDOS" VOLVEN 30 ANOS DESPOIS

Foi a primeiros dos anos 80 cando, no marco da chamada "movida viguesa", xurdiu o primeiro grupo de rock que empregou e popularizou o galego nas súas composicións. Hoxe resúltanos estraño e case exótico oír unha canción en galego nas emisoras de radio xeneralistas. Pois ben, daquela Os resentidos chegaron a ser uns auténticos supervendas e o seu tema "Galicia caníbal" escoitouse nas ondas, non só en Galiza, senón tamén no resto do estado. Un precedente que deu lugar máis adiante ao "rock bravú", ao que se engancharon un feixe de grupos que tamén compuñan en galego. Actualmente, por fortuna, contamos cun amplo abano de intérpretes na nosa lingua e, dalgún xeito, debémosllelo, como non, aos resentidos.
O seu concerto de retorno terá lugar en Ourense o 12 de maio.